شعر - زكريا اللبيب
أنا نعرفك في الحزن لو واتاك
ماهو عزا لو ما يطول عزاك
أنا نعرفك فى الحزن لو واتاك
أنا نعرفك موجوعة
و من كل فرحة تحضرك ممنوعة
وبين قنبلة فاكبادنا مسموعة
وبين غافلين اليوم ع اللى جاك
وبين من يريدك خاضعة لي طوعه
و فتان ماشي في الجنازة معاك
سياسة رخيصة بدمنا مصنوعة
وياما قبل ما سيّسُو بضناك
عزانا وطن نفس العزا ودموعه
عزانا عزا واحد عزانا عزاك
اليوم ليبيا بيك كلها مفجوعة
على عيون بنغازي تموت فداك
و تبكي عليك طرابلس موجوعة
و ما في قلب إلا خفق يالاك
أنا نعرفك يا نايضة مفزوعة
ع الظلم ليش الظلم ما يخطاك
ليش المكايد نارها مولوعة
و خنجر غدر مسموم ديمة وراك
و ليش النفوس التافهة المخدوعة
باعوك فيهم من يقول معاك
وامتى الضماير في بلادي توعا
وأمتى الفرح يشعل شمع سلواك
اليوم في المواجع خاشة موسوعة
مش عارفين الستر كيف معاك
مات القلب ما يندروش ضلوعه
وآخر نبض ضلعه بكاك بكاك
أنا نعرفك في الحزن نعرف نوعه
أنا نعرفك في الحزن لو واتاك