شعر - وليد الرملي
سلامي عليك بنغازي
يا حب قلبي يا وطاء الأعزازي
يا الجميله
الي بيك عقلي وهنوته ودليله
طيفك ايزور ف نومتي كل ليله
يطرب احلامي ايودها بأعجازي
ايحيد الحزن والكرب عني ايشيله
ويبقى ايناجي في هواي ايزازي
يقرب مناهل خاطري ويحكيله
ويشرح مقاصد ف الصدر بأيعازي
يسعد منامي في اوقات جميله
تمنيت نومي ايدوم لا قفّازي
يا الحنونه
يا اعجاز ربي في خلايق كونه
سمحه وجمالك حلو باهي لونه
وكل سمح جاور طينتك منحازي
ارقيتي وسكنتي علو مانك دونه
ابقيتي صقر في هامته ركّازي
مانك احدا لابوم لا حبرونه
انتي كما في الطير رانك بازي
ياما عليك اعداء ذاقو الهونه
فاشست ذلو وانقليزي ونازي
ليك سلامي
يا وطن غالي لوعتي به رامي
يا نشوتي يا منيتي وغرامي
يحميك ربي من ظليم وهازي
يحميك ياشوف الوليف السامي
يانبض طيب ف القلب هزازي
ياروح حلوه عشقها دوّامي
الها نغم حالي موعطب نشّازي
تنعش اسبابي اترفها حوّامي
اتخلي كياني بفرحته نقّازي
سلام تحيه
من وسط قلبي ليك موش اشويه
يانور ضاوي ف الوطاء جمليه
ضيك تمادا اوصل ف الحجازي
وخطّّم علي الأردن وفي تركيه
وفي أيران شكّع في جبل الأهوازي
وفات حتى القاره الهنديه
اتقول مد نافع كيف علم الرازي
وحتى العلم احذاك مايجي شيه
لو خيروني ما خطاك انوازي
___________________
بنغازينا
يا طيف حالي بالحلا امزهينا
انحبوك يلي اسماك…
انحبوك يا العظيمه
وللحب في زولك اقصص قديمه
يا مهجة الخاطر الكل ايودك
الكل يبعثلك غلا وتبسيمه
ما هناك والي اسلم جاء في ضدك
انتي الساميه والعالية ف القيمة
انتي امرابطه وحتى الي في ضدك
يبقى هميم وحالته تخميمه
ياما علي شطك مسحتي خدك
وياما صبرتي ع الزمان وضيمه
وياما ف بحرك موج غنى ردك
لحنك جميل وحلو يالوسيمه
لحنك شذى نوار يبعث ودك
ف عز الصقا يع , في شتاء امدفينا
انحبوك يلي اسماك…
انحبوك يا وداده
انحبوك يلي صامته محتاره
يلي علينا دايما نشاده
ان رحنا بعيد والا سكنا الداره
ما تواخذينا ان كان بقيت عاده
رحلة احبابك وهجرتي بأماره
هكي الظروف حكمت بكل براده
وهكي ايعيش القلب كل امراره
وهكي العين ادموعها سقاده
بعدك نكد , هو الي امبكينا
انحبوك يلي اسماك…
انحبوك سيدي حسين
يا صابري, يا رويساتنا يا زين
يا فويهات , يا سلماني
يا محيشي يا دولار يا بوقرين
يا ليتي , يا بركه ويا هواري
يا اسكابلي يا زهوتي والعين
يا اخريبيش يلي فيك كثير معاني
يا كيشنا يا ناسنا الغاليين
يا كل نقطه من بعيد وداني
برنيق* تبقى صرح ل يوم الدين
برنيق يمي الشوق فيك دعاني
برنيق كل العمر ليك حنين
برنيق بعدي ليك راه كواني
يا ريت يقرب يوم اللقاء يا مينه
انحبوك يلي اسماك
انحبوك يا الزكيه
يا نفس طيب ف العلالي صار
يا مجدنا يا روحنا جمليه
يا مقعد الغاليين والسمار
يا وطن باقي صرح ضاوي ضيه
حتى عدوك فيك راهو حار
علي ما يحاول فيك سو النيه
كنتي عليهم كيف ويل ونار
انحبوك وانتي لزولنا الهويه
انتي أمنا وانتي البو والدار
انتي الي الأوقات فيك هنيه
ما في مكان ايعادلك ماصا ر
يا ريت نبقى فيك حتى اشويه
وبعدين نبقى انموت فيك نهار
المهم انتي الباقيه والحيه
ذكراك حتى موتنا امنسينا
انحبوك يلي اسماك بنغازينا…
___________________
ياعين يا نشاده
ادموعك على الأعزاز تمن عادة
تبكي عليهم يانا
ناس ساكنين الشط في جليانه
لاهنتي ولا هانوا أسباب غلانا
غير الوقت دار الهجر وطال ابعاده
تبكي ديمه
علي ناس في البركه وفي بوهديمه
جرح الغلاء عندك تمادا ضيمه
وأنتي بروحك دايره نكّاده
امغير تعاني
علي زول باهي ليك في السلماني
من لوعتك في ذكرته شقاني
كثّر اسهوري وفكها الوساده
اللوع ايزيده
تلمليم ناسك وسط راس اعبيده
عمر الوفي مايوم يترك ريده
وانتي تركتي الود ياشراده
امغير اتنين
يا قلب في سبة افعال العين
احزن علي رواد سيدي حسين
علي افراقهم محكوم بالأباده
لا اتقول ليش
يلي انسيت اولافنا ف الكيش
ومهبول من ينساك يا اخريبيش
مجنون ماعندش كثير إراده
ياعين يا نشاده
أدموعك علي الأعزاز تمن عاده
ياعين راك خطيه
درتي العيبه في ابعادك ليه
من حب قلبي بنت بنغازيه
حلوه جميلة ناعمه وداده
لها اسم معروفه لها بيتية
لها خلق وادب ودينها وزياده
لها ناس معروفين اطياب النيه
ناس صبايين في الميعاده
ابكي وديري نوح ياكحلية
ماينفع ابكاك ودمعتك منزاده
مادرتي الحق امغير شماته فيه
زدتي لزولي عزوته حساده
حرمتي ارويحك من الناير ضيه
وحرمتيه قلبي من اينول مراده
ادموعك علي الأعزاز تمن عاده
يا عين يا نشاده