شعر - مصطفى كبلان
يا بنغازي يا بلادي الحبيبة
معا لبعاد في قلبي قريبه
يا بنغازي يا بلاد الحبايب
ما ننساك حتى ان كنت غايب
والزفرات من فلبي الذايب
نار الشوق زادت في لهيبه
يا بنغازي يا موطن اصحابي
ونحنا صغار ورفقة شبابي
مع لنسام نبعثلك جوابي
او وين الرد ومنهو يجيبه
يا بنغازي نبعثلك سلامي
عمري فيك من احسن ايامي
يا نجواي يا حبي وغرامي
جميع اوصافك في وصفك عجيبه
اتقول رضيع يبكي يريد امه
يريد عرب من ناسه ودمه
ناس اعزاز كيف خاله وعمه
دمعي سال بعد طالت الغيبه
يا بنغازي يا أحلى انغامي
نفكر فيك حتى في منامي
ليلي طال يا مكثر اوهامي
القلب حزين متكاثر نحيبه
يا بنغازي يا حلمي السعيد
انتي معاي ونا عنك بعيد
يوم نجوك يبقى يوم عيد
كلامي دمع سطرته كتيبه
يا بنغازي ما يوماً نسينا
سيدي حسين والبركة الزينة
عيشة غربه ما يوماً زهينا
بناس اكرام او ليهم الهيبه
سلامي لكم يا أغلى الغوالي
ناس اكرام في الدنيا عوالي
بعدكم حال لو ريتوه حالي
والمخلوق ما بيده نصيبه
والمخلوق ما بيده اقداره
عيشة هم في بلاد النصارى
افوطن الجار ما يعرفش جاره
بلاد الكفر والعيشة التعيبه
بلاد الكفر ما فيها كريم
ان كان شكيت ما تلقى رحيم
الله يحميك يا وطني العظيم
ويحمي فيك بنغازي الحبيبه