شعر - ونيس العريبي
بنغازي وكل زناقيها .. مغرم بيها .. نعشق حاضرها وماضيها
==
بنغازي أم المنارة .. والبحارة .. وقصر البركة
وسر اخباره .. وضريح الشيخ وزواره .. نبرم فيها .. ونلعب في كل نواديها
بنغازي وكل زناقيها
==
بنغازي وكل شوارعها .. يامسمحها .. ويا مسمح كل مطارحها .. ندعوه المولى إيفرحها .. ويهنيها .. الرحابة بكل اللي إيجيها
بنغازي وكل زناقيها
==
بنغازي وكل زواياها .. يا مبهاها .. في الدنيا ما شي يسواها .. ما نقدرش انعيش بلاها .. ونخليها .. مسرع ما انرايف ونجيها
بنغازي وكل زناقيها
==
بنغازي وكل مناطقها .. سمح عبقها .. بكل الحب إيفوح حبقها .. كل اللي جاها يعشقها .. يقعد فيها .. يعشق هلها ومواليها
بنغازي وكل زناقيها
==
بنغازي يا مسمح هلها .. ويا مجملها .. ومسمح شاطيها وبحرها .. وأحلى قعدة تحت قمرها .. الحوت عليها .. المولى من الحاسد يحميها
بنغازي وكل زناقيها