بنغازى عصية دوم ....ماتنسوها
ومايوم تمشي كيفما تبوها

بنغازى عصية دوم ...مايكسرها
ولاظلم ظالم ع البكا يجبرها
ولايضرها صعلوك لايقهرها
وهذى الحقيقة الواضحة وأقروها
ومايوم واطت للقرود ظهرها
مهما بسذاجة حاولوا بزوها
ومهما أنخنقت والظلام عصرها
صعبة عنيدة واعرة لاقوها
لاتنهزم لامعركة تخسرها
مهــــــــما تنادوا ضدها زروها

م الأوباش
لاتنطوى لاأيكيدها خفاش
أتعده مهازل طاش ياما طاش
ولعبة سخيفة ف دارها لعبوها
أصحاب الأجندة الواضحة بكلاش
هاللى ف شوارع مظلمة طعنوها
ولاأيكيدها تحريش م الحراش
وهاللى دسايس واجدة دسوها
بكرة يبان الورد م الخشخاش
ويارايدين ركوبها أنسوها

__________________________________

لأنها بنغازى
ترخص الروح اتهون فى سباك
ياصابرة ياللى كبير غلاك
يارباية
يافازعة للكل ياكساية
ووقت العزاء ياباكية وعزاية
ياداعية للوطن وقت دعاك
يارافضة للظلم تبقي راية
يافاقدة فرسان فى مدعاك
ياقاهرة ياكارهة الغزاية
ياصامدة ياواقفة لعداك
دونك رجال وتاركين صبايا
لله يدعن ربنا يرعاك
دونك أطفالك رافضين هدايا
هالعيد ويقولوا العيد معاك
دونك تريس الصاعقة ياآّية
والجيش أصلاّ عاشقين دفاك
دونك شبابك ياحدود الغاية
لاجلك يصبوا رافضين بكاك
دونك بناتك والعيون ملايا
تربن على عشقك وصون هواك
ولاجلك أتصد النار ياصباية
تفداك برقة كلها تفداك
وصيور للظالم تكون نهاية
أبقي واثقة مايسيبك مولاك
ونختم كلامى نقول فى سهراية
بنغازى أيش الحياة لولاك

__________________________________

 بنغازى قالت منســـــــجمة
ضد العادى بأعلى صوت
عندى جيش نزل م الرجمة
لاجل تراب الوطـن يموت
لانضعف لانواطى راسى
مانرضخ للظلم القاسـى
عادى وســـط النار أنفوت
رغم الجرح اللى تعبها
بنغازى قالــــــــــت كلمتها
قالت نكسبها نكسبها
بنغازى مانى خاســــــرتها
خوتى الشرق اليوم حمونى
فزعولى بالروح فــــــــــدونى
رغم النار ورغــــــــــم الموت